KYRKJEMUSIKKVEKA 2025


KYRKJEMUSIKKVEKA 2025


Ein 100-åring skal feirast – Nynorsk salmebok. Kva passar då betre enn å syngje i lag?

Årets utgåve av Kyrkjemusikkveka vil by på ein liten forsmak av feiringa som skal fylle heile året. Alle seks kyrkjer i Volda kommune har kvar sin konsert, og ein må då setje av dei siste helgene i mars og ein fredag i april for å få med seg alt.

Den første konserthelga startar med «Streng & Belg», folkemusikk og folkemusikkinspirerte komposisjonar som Jorunn Marie Kvernberg og Morten Bollerud skal presentere i Bjørke kyrkje. Så blir det vårleg stemning i Hornindal kyrkje når koret Cantando og Hornindal songlag inviterer til konserten sin med tittelen «No livnar det i lundar». Ein kan rekne med at i begge konsertar vert det invitert til allsong.

Helga etterpå byrjar med «Nynorske salmar & ny norsk musikk» der Morten Bollerud (trekkspel, piano) saman med Knut Sverre Nes (song) og Kristine Sofie Orheim Hansen (fiolin) vil presentere salmar og viseinspirerte nykomponerte stykke i Austefjord kyrkje. Også her vert det rom for å stemme i den eine eller andre salmen.

Med framføringa av W. A. Mozart sitt vel mest kjente kyrkjemusikkverk – Requiem i d-moll – kjem det eit lite avbrekk frå salmetematikken. Sunnmøre Oratoriekor, Høgskulekoret og Symfoniorkesteret ved Høgskulen i Volda står for konserten. Ein kan glede seg til å høyre lokale kjendissar i solistrolle: Karen Rosenberg Olsen (sopran), Ragnhild Engeset (alt), Arnulf Hjertvik (tenor) og Bjørn Holum (bass). Denne konserten kan ein få høyre i Volda kyrkje. Kantor Bert Handrick er dirigent.

Sjølvsagt må også ein musikalsk gudsteneste vere med i festivalen. Den kan ein få oppleve i Kilsfjord kyrkje på søndag formiddag. Der kan ein få høyre på songen til Karoline og Sofie Kleven og Fjordafolk. Erlend Koppen er organist og korets dirigent.

Arrangementrekka vert avslutta med «Salmekveld – Nynorsk salmebok 100 år» i Dalsfjord kyrkje i april. Der blir det mykje allsong med kjente og kjære salmar som har nynorsk tekst. Damekoret Vest Vokal og Dalsfjord mannskor blir med med nokre fine innslag, og organistene Morten Bollerud, Erlend Koppen og Bert Handrick står for akkompagnementet til salmane der dei skal bruke ulike tangentinstrument – orgel, piano og trekkspel.

Vel møtt til Kyrkjemusikkveka 2025!

 

Programoversikt:

Laurdag 22. mars

Bjørke kyrkje                  (kontakt: Morten Bollerud)

              Kl. 18.00            «Streng & belg»

Konsert med Jorun Marie Kvernberg og Morten Bollerud

Bjørke kyrkje har ein fantastisk beliggenheit og ei stilfull utsmykking med mange fine fargar og folkelege motiv. Kva passar så betre enn ein intim konsert med to dyktige musikantar som har mykje å by på innan folkemusikk? Jorun Marie Kvernberg (fele, hardingfele, song) og Morten Bollerud (trekkspel) har spelt ofte i lag og vil framføre folkemusikk og folkemusikkinspirerte stykke som dei har komponert sjølve – eller vert til i augneblinken som improvisasjon.

Ein kan også rekne med nokre salmar (med nynorsk tekst) som alle frammøtte kan stemme i.

Ein ting er sikker: det vil bli ein fin stund i ein vakker kyrkje som ligg ved sjøkanten mellom høge fjell. Ikkje gå glipp av den! Etter konserten kan ein slå opp ein prat med musikarane også.

Billett: 150,- kr (gratis for born under 16 år)

 

Søndag 23. mars

Hornindal kyrkje           (kontakt: Morten Bollerud)

              Kl. 18.00           «No livnar det i lundar» – korsong, musikk og allsong

Korkonsert med Cantando, Hornindal songlag, Morten Bollerud +

Erlend Koppen

Kyrkjekaffi/-mat etter konsert

To kor frå kvar sin kant skal møtest til felleskonsert. Cantando frå Vartdal og Hornindal songlag. Dette kan by på ulike korstykke i ulike sjangrar og stilartar. Innimellom vert det også allsong når organistane Morten Bollerud og Erlend Koppen vil spele til nokre fine salmar i høve Nynorsk salmebok sitt 100 års-jubileum.

Kvelden rundar av kring kakebordet der soknerådet serverer også kaffe og te. Kjekt med litt prat med koristane også.

Billett: 150,- kr (gratis for born under 16 år)

 

Fredag 28. mars

Austefjord kyrkje           (kontakt: Morten Bollerud)

              Kl. 19.00           «Nynorske salmar & ny norsk musikk»

Konsert med Kristine Sofie Orheim Hansen (fiolin), Knut Sverre Nes

(song), Morkakoret, Morten Bollerud og Erlend Koppen

Kyrkjekaffi etterpå

Nynorske salmar og ny norsk musikk – ein tittel som kanskje vekkjer nysgjerrigheit? Det skal syngjast i lag, og musikarane skal framføre musikkstykke som er litt nyare. Nokre er til og med komponert heilt nytt. Mellom anna har Morten Bollerud skreve ein del stykke for trekkspel som han sjølv karakteriserar som stilblanding mellom folkemusikk og visemelodi. Han har ofte naturopplevingar i bakhovudet når han set seg ned for å lage sin eigen musikk.

Med han er det lokale musikarar som skal opptre: Kristine Sofie Orheim Hansen (fiolin) og Knut Sverre Nes (song). Erlend Koppen og Morten delar på akkompagnementet når det skal stemmast i allsong av nokre fine nynorske salmar.

Også denne konserten vert avslutta med kveldsmat og kaffe som soknerådet vil stille med.

Billett: 150,- kr (gratis for born under 16 år)

 

Laurdag 29. mars

Volda kyrkje                    (kontakt: Bert Handrick)

              Kl. 18.00            Wolfgang Amadeus Mozart: Requiem d-moll, KV 626

                                        Sunnmøre Oratoriekor, Høgskulekoret, Symfoniorkesteret ved Høgskulen i Volda

Solistar: Karen Rosenberg Olsen (sopran), Ragnhild Engeset (alt),

Arnulf Hjertvik (tenor), Bjørn Holum (bass)

Dirigent: Bert Handrick

Då Wolfgang Amadeus Mozart skreiv sitt Requiem, var han 35 år gammal og låg sjølv på dødsleie. Verket blei ikkje fullført. Franz X. Süssmayr, elev av Mozart, tok seg av å skrive ferdig denne vakre komposisjonen i Mozarts ånd - ei "oppstode" om ein så vil.
Denne verkhistorien gjer at ein godt kan framføre rekviemet i pasjonstida utan å "bryte" særleg med kyrkjelege tradisjonar.
Sunnmøre Oratoriekor med Volda kyrkjekor som kjernen, har samla omlag 50 songarar frå heile regionen til korseminar i forkant av konserten. Samarbeidspartnarar er Høgskulekoret og Symfoniorkesteret ved Høgskulen i Volda.

Billett: 350,- kr (gratis for born under 16 år og studentar ved Høgskulen i Volda).

 

Søndag 30. mars

Kilsfjord kyrkje               (kontakt: Erlend Koppen)

              Kl. 11.00           Musikalsk gudsteneste

etterpå kyrkjelydens årsmøte med musikalske innslag og kyrkjekaffi

Musikkinnslag ved Fjordafolk, Karoline & Sofie Kleven (song), Erlend

Koppen o.a.

 

Fredag 11. april

Dalsfjord kyrkje             (kontakt: Erlend Koppen)

              Kl. 19.00           Salmekveld – Nynorsk salmebok 100 år

med Dalsfjord mannskor, damekoret Vest Vokal, Erlend Koppen, Morten Bollerud +                 Bert Handrick

  • Gamle salmar frå 100åringen og nyare salmar med nynorsk tekst

Kyrkjekaffi etterpå (sokneråd)

Som tidlegare år har vi med ein salmekveld under Kyrkjemusikkveka i år også. Grunna 100 års-jubileet for Nynorsk salmebok som også skal feirast seinare i år med nasjonale og regionale arrangement, så set denne salmekvelden fokus på den delen av salmeboka som har nynorsk tekst. Nokre salmar er omsetingar, men ein god del er original skreven med nynorsk tekst. Desse skal vi settje spesielt fokus på i år.

Organistane i Volda Erlend Koppen, Morten Bollerud og Bert Handrick vert med til å spele til salmane. Det blir orgel, piano og trekkspel dei skal bruke til. Og så vert det nokre korinnslag med både Dalsfjord mannskor og damekoret Vest Vokal.

Vel møtt til ein triveleg kveld med mykje allsong.

Kollekt.

Tilbake